ياروحي وسعي الصدر والباب خلكج فضي
وماعون صبرج طفح للناس كله فضي
وهمان من لامني مايدري لنه فضي
من حيث من لامني مايدري ضيم العلي
رادوني انزل لجن ضليت كلش علي
كالو علي رافضي جيه كلت احبن علي
ماطول احبن علي خليني الف رافضي
ادك زنجيل
انته شضارك من كون ادك زنجيل
تدحكني عله عمدا تمس ثنايا الروح
توجر نار حجيي وكوه بيه تعيل
كف وجوز مني ياهو امشه عليك
اعمر كظيته سجه وانته تسحك ريل
كون ترد الي ويسعفني كون الحيل
جاشلت الجبل وبراسي ادكن حيل
انته شضارك من احزن بعاشور
من تنتخي دموعي وتنتفض وتسيل
كون اترد الي بعيوني ادك شلال
ولو ترهم عيوني احفره نهر النيل
كون ترد الي اتلثم باهات
وابوك الهندس والبسهه من الليل
انته اشضارك من اطبخ بعاشور
سوني ابرهه وكدر الهريسة الفيل
ورموني بكل حجر موبس حجر سجيل
انته اشضارك من كون اعلك اعلام
وعله راس العلم اسم الحسين ايشيل
حتى عله العرش تلكه الروايا السود
وتلبس كله اسود حتى جبرائيل
نوح الدنيا هزهه والله علم نوح
سويلك سفينه من يجيك السيل
سواله سفينه وطمه جف الكاع
سفينتنه الحسين الابد عيب تميل
الطم كفروني ابجي كالوا عيب
راووني المرار وضوكوني الويل
نتمرمر صدك بس مانجرعه الويل
شواربنه اتعنكش عله احسوس الخيل
من نطلع نجفل جن زراك اسهيل
وطبع كهوه انتونس على الدك احيل
الزمن كبلك تلاوه ويه القضية اسنين
لحد ماكال كافي بويه انا دخيل
جم ساطور معفي وجم زند عزراب
رادوهه القضية اتصير قال وقيل
انته اشضارك لوزرنه مشايه
ونزور احنه الكفيل الكد الحجاية
نعم كد الحجاية ويشهدله الكون
كسر خشم الفرات وماشرب ماية
نعم كد الكفالة وعدنه بيه اشهود
طاحت ركبته وماطاحت الراية
انته اشضارك من كون ادك قامه
هيه الهامه الك لو ماللتي الهامه